२०२५ फॉर्म्युला वन हंगाम

२०२५ फॉर्म्युला वन हंगाम हा एफ.आय.ए. फॉर्म्युला वन शर्यतीचा ७६वा हंगाम होता. ह्या हंगामामध्ये २४ शर्यती खेळवल्या गेल्या, ज्यात १० संघांच्या एकूण २१ चालकांनी सहभाग घेतला. १६ मार्च २०२५ रोजी ऑस्ट्रेलियामध्ये पहिली तर ७ डिसेंबर २०२५ रोजी अबु धाबीमध्ये अखेरची शर्यत खेळवली गेली.

चालक आणि संघांनी अनुक्रमे चालक अजिंक्यपद आणि कारनिर्माते अजिंक्यपद या विजेतेपदांसाठी स्पर्धा केली. या हंगामात लॅन्डो नॉरिसने फॉर्म्युला वनमधील आपल्या सातव्या हंगामात पहिले जागतिक चालक अजिंक्यपद पटकावले आणि मॅक्स व्हर्सटॅपनच्या सलग चार वर्षांच्या विजेतेपदाच्या वर्चस्वाचा अंत केला. या हंगामात प्रामुख्याने मॅकलारेनचे चालक नॉरिस आणि ऑस्कर पियास्त्री, तसेच रेड बुल रेसिंग-होंडा आरबीपीटी संघाकडून शर्यतीत सहभागी झालेला गतविजेता व्हर्सटॅपन यांचे वर्चस्व राहिले. हंगामाच्या अखेरच्या अबु धाबी ग्रांप्रीपूर्वी हे तिन्ही चालक जागतिक चालक अजिंक्यपदाच्या शर्यतीत होते. नॉरिस गुणतालिकेत आघाडीवर होता, तर व्हर्सटॅपनने त्याच्याशी असलेले १०४ गुणांचे अंतर कमी करून अवघ्या १२ गुणांवर आणले होते. हंगामाच्या अंतिम शर्यतीत नॉरिसने मिळवलेले तिसरे स्थान विजेतेपद पटकावण्यासाठी पुरेसे ठरले. गतविजेत्या व्हर्सटॅपनने ही शर्यत जिंकली आणि अंतिम गुणतालिकेत तो नॉरिसपेक्षा केवळ दोन गुणांनी मागे राहिला. १५ फेऱ्यांपर्यंत अजिंक्यपदाच्या गुणतालिकेत आघाडीवर असलेल्या पियास्त्रीने नॉरिसपेक्षा १३ गुणांनी मागे राहत हंगामात तिसरे स्थान मिळवले. नॉरिस जागतिक चालक अजिंक्यपद पटकावणारा एकूण ३५वा चालक आणि मॅकलारेनकडून हे विजेतेपद मिळवणारा आठवा चालक ठरला. सिंगापूर ग्रांप्रीमध्ये गतविजेत्या मॅकलारेनने आपले जागतिक संघ अजिंक्यपद यशस्वीपणे राखले. यासह दहा विजेतेपदे मिळवून मॅकलारेनने विलियम्सला मागे टाकत सर्वाधिक संघ अजिंक्यपदे पटकावणाऱ्या संघांच्या ऐतिहासिक यादीत दुसरे स्थान मिळवले. १९९८ नंतर मॅकलारेनने एकाच हंगामात जागतिक चालक आणि संघ अशी दोन्ही अजिंक्यपदे पटकावण्याची ही पहिलीच वेळ होती.

विकिपीडियावर संपूर्ण लेख वाचा →