२०१८ फॉर्म्युला वन हंगाम हा एफ.आय.ए. फॉर्म्युला वन शर्यतीचा ६९वा हंगाम होता. या हंगामात २१ शर्यती आयोजित करण्यात आल्या आणि त्यांत ११ नोंदणीकृत कारनिर्माते संघांकडून एकूण २० चालकांनी भाग घेतला. २५ मार्च २०१८ रोजी ऑस्ट्रेलियामध्ये पहिली, तर २५ नोव्हेंबर २०१८ रोजी अबु धाबीमध्ये अखेरची शर्यत झाली.
सलग दुसऱ्या वर्षी या हंगामात मर्सिडीज आणि फेरारी यांच्यात अजिंक्यपदासाठी चुरशीची लढत पाहायला मिळाली. २०१८ हंगामात प्रत्येकी चार वेळा जागतिक चालक अजिंक्यपद पटकावलेले लुइस हॅमिल्टन आणि सेबास्टियान फेटेल हे दोन चालक अजिंक्यपदाचे प्रमुख दावेदार होते. फॉर्म्युला वनच्या इतिहासात प्रथमच चार वेळा जागतिक विजेते ठरलेले दोन चालक पाचव्या विजेतेपदासाठी एकमेकांविरुद्ध स्पर्धा करत होते. त्यामुळे पत्रकार आणि चाहत्यांनी या हंगामातील स्पर्धेला "पाचव्या विजेतेपदासाठीची लढत" (Fight for Five) असे संबोधले. संपूर्ण हंगामात या दोन्ही चालकांमध्ये अजिंक्यपदासाठी तीव्र स्पर्धा सुरू होती आणि गुणतालिकेतील आघाडी पाच वेळा एकाकडून दुसऱ्याकडे गेली. हंगामाच्या मध्यावर, ब्रिटिश ग्रांप्रीनंतर फेटेलने हॅमिल्टनवर आठ गुणांची आघाडी घेतली होती. मात्र, हॅमिल्टनने २०१८ मेक्सिकन ग्रांप्रीमध्ये आपले पाचवे जागतिक चालक अजिंक्यपद निश्चित केले, तर त्याच्या मर्सिडीज संघाने पुढील ब्राझिलियन ग्रांप्रीमध्ये सलग पाचवे जागतिक कारनिर्माते अजिंक्यपद पटकावले. फेरारीचा चालक सेबास्टियान फेटेल हा हॅमिल्टनपेक्षा ८८ गुणांनी मागे राहून चालक अजिंक्यपदाचा उपविजेता ठरला, तर त्याचा संघसहकारी किमी रायकोन्नेन याने तिसरे स्थान पटकावले. कारनिर्माते अजिंक्यपदात मर्सिडीजने फेरारीवर ८४ गुणांची आघाडी घेत विजेतेपद पटकावले. फेरारीपेक्षा १५२ गुणांनी मागे राहिलेल्या रेड बुल रेसिंग-टॅग ह्यूअर संघाने तिसरे स्थान मिळवले.
२०१८ हंगामात चालकांच्या कॉकपिटच्या सुरक्षेसाठी "हॅलो" नावाचे नवीन सुरक्षा उपकरण प्रथमच वापरण्यात आले. हॅलो उपकरणाचा समावेश हा टप्प्याटप्प्याने राबवण्यात येणाऱ्या योजनेचा पहिला टप्पा होता. या योजनेनुसार २०२० पर्यंत एफआयएच्या मान्यतेखालील तसेच एफआयएच्या मान्यतेबाहेरील सर्व ओपन-व्हील शर्यत मालिकांमध्ये हे सुरक्षा उपकरण वापरण्याचे नियोजन होते.
या हंगामात भविष्यातील ग्रांप्री विजेता शार्ल लक्लेर याने फॉर्म्युला वनमध्ये पदार्पण केले.
२०१८ फॉर्म्युला वन हंगाम
या विषयावर तज्ञ बना.
