२०२१ फॉर्म्युला वन हंगाम हा एफ.आय.ए. फॉर्म्युला वन शर्यतीचा ७२वा हंगाम होता. ह्या हंगामामध्ये २२ शर्यती खेळवल्या गेल्या ज्यात १० संघांच्या एकूण २१ चालकांनी सहभाग घेतला. २८ मार्च २०२१ रोजी बहरैनमध्ये पहिली तर १२ डिसेंबर रोजी अबु धाबी मध्ये अखेरची शर्यत खेळवली गेली.
रेड बुल रेसिंग-होंडा संघाचा मॅक्स व्हर्सटॅपन याने संपूर्ण हंगामात १० शर्यती जिंकून आपल्या कारकिर्दीतील पहिले चालक अजिंक्यपद पटकावले. व्हर्सटॅपन हा जागतिक चालक अजिंक्यपद पटकावणारा पहिला नेदरलँड्सचा चालक, १९९१ मध्ये आयर्टन सेना याच्यानंतर होंडा इंजिनच्या साहाय्याने विजेतेपद पटकावणारा पहिला चालक, २०१३ मध्ये सेबास्टियान फेटेल याच्यानंतर रेड बुल संघाकडून विजेतेपद मिळवणारा पहिला चालक आणि टर्बो-हायब्रिड युगात मर्सिडीजव्यतिरिक्त इतर संघाकडून जागतिक चालक अजिंक्यपद पटकावणारा पहिला चालक ठरला. ब्रिटिश वाहननिर्माता कंपनीमध्ये लॉरेन्स स्ट्रोल यांनी गुंतवणूक केल्यानंतर अ‍ॅस्टन मार्टिन संघाने १९६० नंतर प्रथमच फॉर्म्युला वनमध्ये पुनरागमन केले.
मर्सिडीजनंतर टर्बो-हायब्रिड युगात जागतिक अजिंक्यपद विजेत्या कारला इंजिन पुरवणारा होंडा हा दुसरा इंजिन पुरवठादार ठरला. सलग चार वेळा विजेतेपद राखणारा आणि एकूण सात वेळा जागतिक चालक अजिंक्यपद पटकावणारा मर्सिडीज-बेंझ संघाचा लुइस हॅमिल्टन उपविजेता ठरला. मर्सिडीजने सलग आठव्या हंगामात कारनिर्माते अजिंक्यपद कायम राखले.
या हंगामात व्हर्सटॅपन आणि हॅमिल्टन यांच्यात संपूर्ण वर्षभर चालक अजिंक्यपदासाठी अत्यंत चुरशीची स्पर्धा पाहायला मिळाली. बीबीसी स्पोर्टचे अँड्र्यू बेन्सन यांनी या स्पर्धेचे वर्णन "क्रीडा इतिहासातील सर्वात तीव्र आणि अटीतटीच्या संघर्षांपैकी एक" असे केले. या दोन्ही चालकांनी हंगामात अनेक वेळा गुणतालिकेतील आघाडी एकमेकांकडून हिसकावून घेतली. विजेतेपदाच्या या दोन प्रमुख दावेदारांमध्ये ब्रिटिश आणि इटालियन ग्रांप्रीमध्ये मोठे अपघात झाले, तर एमिलिया रोमान्या आणि सौदी अरेबियन ग्रांप्रीमध्ये त्यांच्या कारमध्ये किरकोळ धडक झाली. हंगामाच्या अंतिम अबु धाबी ग्रांप्रीपूर्वी दोन्ही चालकांचे गुण समान होते. या शर्यतीचा शेवट वादग्रस्त ठरला, कारण शर्यतीच्या अखेरच्या टप्प्यातील सेफ्टी कार परिस्थिती हाताळताना शर्यत नियंत्रण कक्षाने नियमांचे पूर्णपणे पालन केले नसल्याचे मानले गेले. हंगामाच्या शेवटच्या फेरीत सेफ्टी कारनंतर शर्यत पुन्हा सुरू झाल्यावर व्हर्सटॅपनने हॅमिल्टनला मागे टाकत आपले पहिले जागतिक चालक अजिंक्यपद पटकावले. मर्सिडीजने सुरुवातीला शर्यतीच्या निकालांविरोधात आक्षेप नोंदवला, परंतु तो फेटाळण्यात आल्यानंतर पुढील अपील न करण्याचा निर्णय घेतला. या घटनेच्या पुनरावलोकनानंतर शर्यत नियंत्रण व्यवस्थेत महत्त्वपूर्ण संरचनात्मक बदल करण्यात आले. यामध्ये मायकेल मासी यांना शर्यत संचालकपदावरून हटवणे आणि शर्यत संचालकाला सहाय्य करण्यासाठी आभासी शर्यत नियंत्रण कक्षाची स्थापना करणे यांचा समावेश होता.
२००८ नंतर प्रथमच चालक अजिंक्यपद पटकावणारा चालक कारनिर्माते अजिंक्यपद विजेत्या संघाचा सदस्य नव्हता. तसेच, २००७ मध्ये जागतिक चालक अजिंक्यपद पटकावणाऱ्या किमी रायकोन्नेन यांचा हा फॉर्म्युला वनमधील अखेरचा हंगाम ठरला.
२०२१ फॉर्म्युला वन हंगाम
याची कहाणी तुम्हाला माहित आहे का?
