झी सिने पुरस्कार, सर्वोत्कृष्ट सहाय्यक अभिनेत्री हा हिंदी चित्रपट उद्योगासाठी झी सिने पुरस्काराचा एक भाग आहे. ह्याच्या विजेत्यांची निवड प्रेक्षकांद्वारे केली जाते आणि प्रत्यक्ष समारंभात विजेत्याची घोषणा केली जाते. "सिनेमातील उत्कृष्टता - लोकशाही मार्गाने" हे ह्या पुरस्काराचे ब्रिदवाक्य आहे. नोव्हेंबर १९९७ मध्ये त्यांची स्थापना करण्यात आली. ह्या श्रेणीतील पुरस्कार १९९८ पासून सुरू झाले. हा समारंभ २००९ आणि २०१० मध्ये आयोजित करण्यात आला नव्हता, परंतु २०११ मध्ये पुन्हा सुरू करण्यात आला. कोविड-१९ साथीच्या आजारामुळे २०२१ आणि २०२२ मध्ये हा सोहळा पुन्हा रद्द करण्यात आला, परंतु २०२३ मध्ये तो पुन्हा सुरू झाला.
हा पुरस्कार मार्चमध्ये दिला जातो, परंतु ज्या अभिनेत्रीला हा पुरस्कार मिळतो तिला मागील वर्षी १ जानेवारी ते ३१ डिसेंबर या कालावधीत प्रदर्शित झालेल्या चित्रपटातील तिच्या कामासाठी हा पुरस्कार दिला जातो.
२००४ पर्यंत पुरस्कार वितरण समारंभ मुंबईत आयोजित केले जात होते. २००४ नंतर, हा समारंभ दुबई, लंडन, मॉरिशस, मलेशिया, अबू धाबी, सिंगापूर, मकाओ येथे आंतरराष्ट्रीय स्तरावर देखील आयोजित केला गेला आहे. ह्या श्रेणीतील पहिली मानकरी १९९८ मध्ये अभिनेत्री करिश्मा कपूर होती जिला दिल तो पागल है मधील कामासाठी हा पुरस्कार मिळाला होता.
सुश्मिता सेन (२००० व २००३), दिव्या दत्ता (२००५ व २०१४), स्वरा भास्कर (२०१२ व २०१४) आणि शबाना आझमी (२००४ व २०१७) या चार अभिनेत्री आहेत ज्यांना आजपर्यंत दोनदा हा पुरस्कार मिळाला आहे. २०१४ मध्ये दिव्या दत्ता आणि स्वरा भास्कर यांना त्यांच्या भाग मिल्खा भाग आणि रांझणा या चित्रपटांमधील कामगिरीसाठी विभागून हा पुरस्कार मिळाला होता. माधुरी दीक्षित, राणी मुखर्जी आणि अनुष्का शर्मा या तीन अभिनेत्री आहेत ज्यांना सर्वोत्कृष्ट अभिनेत्री आणि सर्वोत्कृष्ट सहाय्यक अभिनेत्री दोन्ही पुरस्कार मिळाले आहेत.
झी सिने पुरस्कार, सर्वोत्कृष्ट सहाय्यक अभिनेत्री
हा लेख तुमचा दृष्टिकोन बदलेल.