पाकिस्तान राष्ट्रीय महिला क्रिकेट संघाने जानेवारी-फेब्रुवारी २०२१ मध्ये ३ महिला आंतरराष्ट्रीय ट्वेंटी२० सामने आणि ३ महिला आंतरराष्ट्रीय एकदिवसीय सामने खेळण्यासाठी दक्षिण आफ्रिकेचा दौरा केला. आधीच्या वेळापत्रकानुसार काही सामने हे पीटरमारित्झबर्गमधील सिटी ओव्हल वर आयोजित केले गेले होते. परंतु १० जानेवारी २०२१ रोजी दक्षिण आफ्रिकन क्रिकेट बोर्डाने सर्व सामने डर्बन शहरातील किंग्जमेडवर हलवले.
दौरा जाहीर झाल्यानंतर पाकिस्तानी कर्णधार बिस्माह मारूफ हिने वैयक्तिक कारणाने दौऱ्यातून माघार घेतली. तिच्या जागी पाकिस्तानी संघाची जवाबदारी जव्हेरिया खानकडे सोपवली गेली. दक्षिण आफ्रिकेची नियमीत कर्णधार डेन व्हान नीकर्क ही सुद्धा दुखापतीमुळे खेळू शकली नाही. क्रिकेट दक्षिण आफ्रिकेने सुने लूसकडे दक्षिण आफ्रिकेच्या महिला संघाच्या कर्णधारपदाची धुरा सोपवली.
पहिल्या महिला आंतरराष्ट्रीय एकदिवसीय सामन्यात प्रथम फलंदाजी करून २००/९ धावसंख्या उभारल्यानंतर दक्षिण आफ्रिकेच्या महिलांनी पाकिस्तानी महिला क्रिकेट संघाला ३ धावांनी मात दिली. दुसऱ्या सामन्यातसुद्धा दक्षिण आफ्रिकेने पाकिस्तानी महिलांचा १३ धावांनी पराभव करत एकदिवसीय मालिका जिंकली. दुसरा एकदिवसीय सामना हा शबनिम इस्माइलचा १००वा महिला आंतरराष्ट्रीय एकदिवसीय सामना होता. तिसऱ्या सामन्यात सुद्धा निर्भेळ यश संपादन करत दक्षिण आफ्रिकी महिलांनी महिला आंतरराष्ट्रीय एकदिवसीय मालिका ३-० अशी जिंकली.
दुखापतीमुळे जव्हेरिया खानला पहिल्या महिला ट्वेंटी२० सामन्यासाठी पाकिस्तानच्या संघातून वगळण्यात आले आणि आलिया रियाझकडे तिच्या अनुपस्थितीत संघाचे नेतृत्व सोपविले गेले. दक्षिण आफ्रिका महिलांनी पहिला सामना जिंकला. दुसऱ्या सामन्यासाठी देखीला आलिया लाच पाकिस्तानी कर्णधार बनविले गेले. दुसरा सामना देखील दक्षिण आफ्रिका महिलांनी जिंकत मालिका जिंकली. ट्वेंटी२० मालिकेतील शेवटचा सामना पाकिस्तान महिलांनी डकवर्थ-लुईस पद्धतीनुसार ८ धावांनी जिंकत या दौऱ्यातील पहिला विजय नोंदवला.
दक्षिण आफ्रिकेच्या दौऱ्यानंतर पाकिस्तानी महिला संघ ३ अनौपचारिक वनडे आणि २ महिला आंतरराष्ट्रीय ट्वेंटी२० सामने खेळण्यासाठी झिम्बाब्वेच्या दौऱ्यावर रवाना झाला.
पाकिस्तान महिला क्रिकेट संघाचा दक्षिण आफ्रिका दौरा, २०२०-२१
हा लेख तुमचा दृष्टिकोन बदलेल.
