सिंफेरोपोल (रशियन: Симферополь, युक्रेनियन: Сімферополь) हे पूर्व युरोपातील क्राइमिया ह्या स्वायत्त प्रदेशाची राजधानी व सर्वात मोठे शहर आहे. मार्च २०१४ पासून क्राइमियाचे राजकीय अस्तित्त्व वादामध्ये असल्यामुळे येथे व सिंफेरोपोलवर सध्या रशियाचे अधिपत्य असले तरीही आंतरराष्ट्रीय समुदाय सिंफेरोपोलला युक्रेनमधील एक शहर मानतो. राजधानी असल्यामुळे सिंफेरोपोल क्राइमियाचे राजकीय, आर्थिक व सांस्कृतिक केंद्र आहे.
इ.स. १७८४ साली दुसऱ्या कॅथरिनच्या नेतृत्वाखालील रशियन साम्राज्याने क्राइमियावर अधिपत्य मिळवल्यानंतर ह्या शहराचे नाव सिंफेरोपोल असे ठेवण्यात आले. १८५४-५६ सालच्या क्राइमियन युद्धादरम्यान रशियन सैन्याचा एक प्रमुख तळ सिंफेरोपोलमध्ये होता. दुसऱ्या महायुद्धकाळात १ नोव्हेंबर १९४१ ते १३ एप्रिल १९४४ दरम्यान सिंफेरोपोल नाझी जर्मनीच्या ताब्यात होते. नाझींनी येथील २०,००० पेक्षा अधिक (प्रामुख्याने ज्यू धर्मीय) नागरिकांची हत्या केली होती. २६ एप्रिल १९६४ रोजी सोव्हिएत संघाने क्राइमिया व सिंफेरोपोलची अखत्यारी रशियाकडून युक्रेनकडे सुपुर्त केली.
मार्च २०१४ मध्ये सिंफेरोपोलमध्ये घेण्यात आलेल्या एका जनमतामध्ये बहुसंख्य नागरिकांनी युक्रेनऐवजी रशियामध्ये सामील होण्यास पसंदी दाखवली. २१ मार्च २०१४ रोजी सिंफेरोपोल क्राइमियाचे प्रजासत्ताक ह्या रशियाच्या प्रशासकीय विभागाची राजधानी बनवली गेली.
सिंफेरोपोल
यामागील विज्ञान आणि इतिहास.
