अनिल बाबर

अनिल कलजेराव बाबर (७ जानेवारी, १९५०:गार्डी (विटा), महाराष्ट्र – ३१ जानेवारी, २०२४) हे महाराष्ट्रातील एक राजकीय नेते आणि विधानसभेचे सदस्य होते. त्यांनी वयाच्या १९ व्या वर्षी गार्डी गावचे बिनविरोध सरपंच म्हणून आपल्या राजकीय कारकिर्दीस सुरुवात केली. १९७२ मध्ये ते सांगली जिल्हा परिषदेवर निवडून आले. पुढे १९७७ मध्ये खानापूर पंचायत समितीचे उपसभापती आणि १९८२ ते १९८९ या काळात सभापती म्हणून त्यांनी काम पाहिले. १९८९ च्या विधानसभा निवडणुकीत त्यांनी भारतीय राष्ट्रीय काँग्रेस पक्षाकडून खानापूर-आटपाडी मतदारसंघातून निवडणूक लढवली आणि अपक्ष उमेदवार हणमंतराव पाटील यांचा पराभव करून पहिल्यांदा विधानसभेत प्रवेश केला. १९९४ च्या निवडणुकीत त्यांना राजेंद्रअण्णा देशमुख यांच्याकडून पराभव पत्करावा लागला. १९९९ मध्ये बाबर यांनी राष्ट्रवादी काँग्रेस पक्षात प्रवेश केला आणि राजेंद्रअण्णा देशमुख यांच्या पाठिंब्याने ते दुसऱ्यांदा आमदार म्हणून निवडून आले.

२००४ आणि २००९ च्या विधानसभा निवडणुकांमध्ये त्यांना पराभवाचा सामना करावा लागला. २०१४ च्या विधानसभा निवडणुकीपूर्वी त्यांनी शिवसेनेत प्रवेश केला आणि काँग्रेसचे उमेदवार सदाशिवराव पाटील यांचा पराभव करत पुनरागमन केले. २०१९ च्या निवडणुकीत ते शिवसेनेच्या तिकिटावर सलग दुसऱ्यांदा या मतदारसंघातून विधानसभेवर निवडून आले. आपल्या कार्यकाळात त्यांनी मतदारसंघातील दुष्काळी भागासाठी असलेल्या टेंभू उपसा सिंचन योजनेच्या निधी आणि मंजुरीसाठी काम केले. २०२२ मध्ये शिवसेना पक्षात पडलेल्या फुटीनंतर त्यांनी एकनाथ शिंदे यांच्या गटाला पाठिंबा दिला. ३१ जानेवारी २०२४ रोजी वयाच्या ७४ व्या वर्षी न्यूमोनियामुळे त्यांचे निधन झाले.

विकिपीडियावर संपूर्ण लेख वाचा →