फील्ड मार्शल कोदंडेरा मदप्पा करिअप्पा तथा के.एम्. करिअप्पा (२८ जानेवारी, १८९९:कूर्ग - १५ मे, १९९३:बेंगलुरु) हे एक भारतीय लष्करी अधिकारी आणि मुत्सद्दी होते, ज्यांनी भारतीय भूदलाचे पहिले भारताचे लष्करप्रमुख (कमांडर इन चीफ) म्हणून काम पाहिले. १९४७ च्या भारत-पाक युद्धा दरम्यान त्यांनी पश्चिम आघाडीवर भारतीय सैन्याचे नेतृत्व केले. १९४९ मध्ये त्यांची भारतीय भूदलाचे कमांडर-इन-चीफ म्हणून नियुक्ती झाली. भारतीय भूदलात पंचतारांकित 'फील्ड मार्शल' पद भूषवणाऱ्या केवळ दोन अधिकाऱ्यांपैकी ते एक आहेत; दुसरे अधिकारी फील्ड मार्शल सॅम माणेकशा हे होत.
त्यांची देदीप्यमान लष्करी कारकीर्द जवळपास तीन दशकांच्या काळातील होती. कोडागू येथील मडिकेरी येथे जन्मलेले करिअप्पा, पहिले महायुद्ध संपल्यानंतर लगेचच ब्रिटीश भारतीय सैन्यात दाखल झाले आणि त्यांची '२/८८ कार्नॅटिक इन्फंट्री'मध्ये तात्पुरते फर्स्ट लेफ्टनंट म्हणून नियुक्ती झाली. कारकिर्दीच्या सुरुवातीला त्यांची अनेक रेजिमेंटमध्ये बदली झाली, त्यानंतर ते '१/७ रजपूत' (७ वी राजपूत रेजिमेंट) मध्ये स्थिरावले, जी त्यांची कायमस्वरूपी रेजिमेंट बनली.
क्वेटा येथील 'स्टाफ कॉलेज'मध्ये प्रवेश घेणारे ते पहिले भारतीय लष्करी अधिकारी होते. तसेच, 'चीफ ऑफ स्टाफ' म्हणून कमान सांभाळणारे ते पहिले भारतीय होते आणि कँबर्ली येथील 'इम्पीरियल डिफेन्स कॉलेज'मध्ये प्रशिक्षणासाठी निवडल्या गेलेल्या पहिल्या दोन भारतीयांपैकी ते एक होते. त्यांनी विविध युनिट्स, कमांड मुख्यालय (HQ) आणि नवी दिल्लीतील जनरल मुख्यालय येथे विविध पदांवर सेवा बजावली. भारतीय भूदलाचे कमांडर-इन-चीफ म्हणून पदभार स्वीकारण्यापूर्वी, करिअप्पा यांनी भारतीय लष्कराच्या पूर्व आणि पश्चिम कमांडचे कमांडर म्हणून काम पाहिले होते.
के.एम. करिअप्पा
या विषयावर तज्ञ बना.
